ჭყინტი სიმინდის მთავარი საიდუმლო მოსავლის აღების იდეალური დროის შერჩევაშია. “იორლენდის” ბიომეურნეობაში, კახეთის ღია გრუნტზე მოყვანილი ეს კულტურა განსაკუთრებულ ყურადღებას მოითხოვს. ჩვენი აგრონომები ყოველდღიურად აკვირდებიან ტაროებს, რათა არ გამოგვრჩეს ის მცირე ფანჯარა, როდესაც შაქრები პიკს აღწევს და ჯერ კიდევ არ დაწყებულა სახამებლად გარდაქმნის გამაუხეშებელი პროცესი.
ასევე მნიშვნელოვანია სიმინდის ჯიში. ჩვენ უკვე რამდენიმე წელია მეურნეობაში ბიოსტანდარტების სრული დაცვით მოგვყავს ქართული ჯიშის აბაშის თეთრი და აბაშის ყვითელი. დამწიფების შემდეგ მაღალი ხარისხის მარცვლები ცალკე ვარჩევთ და სტანდარტების სრული დაცვით ჩვენივე წისქვილში ვფქვავთ, რის შემდეგაც უმაღლესი ხარისხის ყვითელი სიმინდის ფქვილს ვიღებთ.
სინთეზური, აზოტოვანი სასუქების უარყოფა ჩვენთვის პრინციპულია, რადგან სწორედ ბუნებრივი, მზით გაჯერებული ზრდა განაპირობებს მარცვლის სიმკვრივესა და ეკოლოგიურ სისუფთავეს. ტაროებს ვკრეფთ საკუთარი მწვანე ფუჩეჩით დაცულს, რათა მომხმარებლამდე ტენიანობის დაუკარგავად მივიდეს.
რატომ არის ყვითელი სიმინდის ნორჩი მარცვალი ორგანიზმისთვის სასარგებლო?
ფიზიოლოგიური კუთხით, ჭყინტი სიმინდი გაცილებით მარტივად მოსანელებელია, ვიდრე მისი დამწიფებული ვერსია. ვინაიდან მასში სახამებლის დონე დაბალია და მარტივი, ბუნებრივი შაქრები ჭარბობს, ის არ ამძიმებს კუჭ-ნაწლავის ტრაქტს.
ნორჩი, ყვითელი მარცვლები მდიდარია ანტიოქსიდანტებით (ლუტეინითა და ზეაქსანტინით), რომლებიც აუცილებელია მხედველობის დასაცავად. გარდა ამისა, ის წარმოადგენს B ჯგუფის ვიტამინებისა და უჯრედისის შესანიშნავ წყაროს, რაც ენერგიის სტაბილურ ნაკადს უზრუნველყოფს და ხელს უწყობს ორგანიზმის ბუნებრივ დეტოქსიკაციას.
ტრადიციული გემოები და კულინარიული ექსპერიმენტები
მიუხედავად იმისა, რომ ჭყინტი სიმინდი თავისთავად სრულყოფილია, ის საინტერესო კულინარიულ შესაძლებლობებსაც გვთავაზობს. „იორლენდის“ პროდუქტებთან ერთად ის შეუცვლელია შემდეგ ვარიაციებში:
- ქართული კლასიკა (მოხარშული): საკუთარ ფუჩეჩთან ერთად, მარილიან წყალში ცხლად მოხარშული ტარო, რომელსაც ზემოდან მსხვილი მარილი აქვს მოყრილი, აბსოლუტური, ნოსტალგიური სიმარტივეა;
- ნაკვერჩხალზე ან გრილზე: პირდაპირ ცეცხლზე სწრაფად შებრაწული ტარო იღებს მსუბუქ, შებოლილ არომატს;
- საზაფხულო კრემ-სუპი: ტაროდან ჩამოთლილი ჭყინტი მარცვლებისგან, მცირეოდენი ნაღებისა და ორგანული თეთრი ხახვისგან მომზადებული, დაბლენდერებული წვნიანი საოცრად ხავერდოვანი და გემრიელია;
- ჯანსაღი გარნირი: ტაფაზე, ზეითუნის ზეთში ან კარაქში წამიერად მოთუშული ნორჩი მარცვლები, „იორლენდის“ ცოცხალ კამასთან ერთად, შემწვარი თევზის იდეალური თანმხლებია;
- ცოცხალი სალათები: რადგან მარცვალი ძალიან ნაზია, მისი უმად დამატება ორგანული, სხვადასხვა ჯიშის პომიდვრისა და კიტრის სალათებში საოცარ ტექსტურულ სიხრაშუნესა და სიტკბოს იძლევა.
